२०२६–२७

दि. २१ जून २०२६ रोजी म. ए. सो. सौ. विमलाबाई गरवारे माध्यमिक व उच्च माध्यमिक विद्यालय, पुणे येथे आंतरराष्ट्रीय योग दिन उत्साहपूर्ण वातावरणात साजरा करण्यात आला. विद्यालयाच्या NCC विभागामार्फत आयोजित करण्यात आलेल्या या उपक्रमात NCC शिक्षक श्री. सुनील जोशी यांच्या मार्गदर्शनाखाली NCC चे ६४ विद्यार्थी सहभागी झाले.
कार्यक्रमाची सुरुवात सामूहिक योगाभ्यासाने झाली. यावेळी विद्यार्थ्यांनी विविध योगासने, प्राणायाम तसेच सूर्यनमस्कार करून योगाचा प्रत्यक्ष अनुभव घेतला. विद्यालयाचे क्रीडा शिक्षक व योग मार्गदर्शक श्री. धनराज प्रजापती यांनी योगाचे शारीरिक, मानसिक आणि बौद्धिक आरोग्यासाठी असलेले महत्त्व विद्यार्थ्यांना समजावून सांगितले. नियमित योगाभ्यासामुळे शरीर निरोगी, मन प्रसन्न आणि व्यक्तिमत्त्व अधिक सक्षम बनते, असा संदेश त्यांनी दिला.
या प्रसंगी विद्यालयाच्या माजी विद्यार्थिनी व योग प्रशिक्षक कु. हर्षदा गुजले, कु. जान्हवी पाटील आणि कु. रेशम पड्याळ यांनी विद्यार्थ्यांना योगासनांचे प्रात्यक्षिकांसह मार्गदर्शन केले. विद्यार्थ्यांनीही मोठ्या उत्साहाने सहभाग घेत योग दिनाचा संदेश आत्मसात केला.
या उपक्रमास विद्यालयाचे मुख्याध्यापक श्री. रोहिदास भारमळ तसेच शालेय पदाधिकाऱ्यांचे मोलाचे मार्गदर्शन लाभले. भारताने जगाला दिलेल्या योग या अमूल्य परंपरेचा सन्मान करत विद्यालयाने राष्ट्रीय आणि जागतिक आरोग्य चळवळीत आपला सक्रिय सहभाग नोंदविला. विद्यार्थ्यांमध्ये आरोग्यदायी जीवनशैली, आत्मअनुशासन आणि सकारात्मक विचारांची जडणघडण व्हावी, या उद्देशाने आयोजित करण्यात आलेला हा उपक्रम यशस्वीपणे संपन्न झाला.

दिनांक 18 जून 2026 रोजी सौ. विमलाबाई गरवारे प्रशालेत महाराष्ट्र राज्य विद्युत महापारेषण कंपनी मर्यादित यांच्या सीएसआर निधीतून तसेच वीर रणांगणा एज्युकेशन फाउंडेशन यांच्या माध्यमातून शिवकालीन युद्धकला प्रशिक्षण उपक्रमांतर्गत लाठी-काठी, तलवारबाजी, दांडपट्टा आदी मैदानी खेळांचे प्रात्यक्षिकाचे आयोजन करण्यात आले .

यावेळी विद्यार्थिनींना विविध युद्धकला प्रकारांचे प्रात्यक्षिक करून दाखवण्यात आले. विद्यार्थ्यांमध्ये स्वसंरक्षणाची भावना जागृत करणे व शारीरिक तंदुरुस्ती वाढविणे हा या उपक्रमाचा मुख्य उद्देश होता. काळाची गरज ओळखून हा उपक्रम प्रशालेत नियमितपणे राबविण्याचा निर्णय घेण्यात आला.

या प्रसंगी फाउंडेशनचे सर्व सदस्य, प्रशालेचे मुख्याध्यापक मा. श्री. रोहिदास भारमळ सर, उपमुख्याध्यापिका सौ. सुनिता गायकवाड मॅडम, पर्यवेक्षिका सौ. शिंदे मॅडम तसेच सर्व शिक्षक इयत्ता आठवी नववी चे सर्व विद्यार्थी उपस्थित होते.
या प्रात्यक्षिकात विद्यार्थ्यांनी मोठ्या उत्साहाने सहभाग घेतला.

नवीन मुलांचे औक्षण करून व पेन भेट देऊन स्वागत करण्यात आले.

त्याचप्रमाणे व्यायामशाळेचे उत्साहात उद्घाटन झाले.

महाराष्ट्र एज्युकेशन सोसायटीचे सौ. विमलाबाई गरवारे प्रशाला व उच्च माध्यमिक विद्यालय, पुणे येथे शनिवार, दिनांक ११ जुलै २०२६ रोजी विद्यार्थ्यांमध्ये ऊर्जा संवर्धनाची जाणीव निर्माण करण्याच्या उद्देशाने "वीज बचत जनजागृती कार्यक्रम" आयोजित करण्यात आला.

या कार्यक्रमात प्रशालेचे शिक्षक श्री. अनंत कुलकर्णी यांनी विद्यार्थ्यांना वीज बचतीचे महत्त्व अतिशय सोप्या व प्रभावी पद्धतीने समजावून सांगितले. त्यांनी प्रत्यक्ष वीज बिलाचे नमुने दाखवून त्यावरील ग्राहक क्रमांक, मीटर रीडिंग, मागील व सध्याचे रीडिंग, वापरलेल्या युनिट्स, वीजदर, बिलाची रक्कम आणि बिलातील विविध माहिती कशी वाचावी, याचे सविस्तर मार्गदर्शन केले.

यावेळी विद्यार्थ्यांना शाळेत तसेच घरामध्ये वीज बचत करण्यासाठी आवश्यक असलेल्या विविध उपायांची माहिती देण्यात आली. विनाकारण दिवे, पंखे, संगणक व इतर विद्युत उपकरणे सुरू ठेवू नयेत, एलईडी दिव्यांचा वापर करावा, नैसर्गिक प्रकाशाचा जास्तीत जास्त उपयोग करावा, आवश्यक नसताना चार्जर व इतर उपकरणांचे प्लग काढावेत तसेच प्रत्येकाने ऊर्जा बचतीची सवय लावल्यास पर्यावरण संरक्षणासह आर्थिक बचतही होऊ शकते, असे त्यांनी उदाहरणांसह स्पष्ट केले.

विद्यार्थ्यांनी कार्यक्रमात उत्स्फूर्त सहभाग घेत विविध प्रश्न विचारले. वीज बचतीविषयीचे त्यांचे गैरसमज दूर झाले तसेच ऊर्जा संवर्धन ही प्रत्येक नागरिकाची सामूहिक जबाबदारी असल्याची जाणीव त्यांना झाली.

कार्यक्रमामुळे विद्यार्थ्यांमध्ये वीज बचतीबाबत सकारात्मक दृष्टिकोन निर्माण होण्यास मदत झाली. त्यांनी आपल्या घरामध्ये आणि परिसरात ऊर्जा बचतीचे नियम पाळण्याचा संकल्प केला.

सौ. विमलाबाई गरवारे प्रशालेत मोठ्या उत्साहात आणि भक्तिभावाने पालखी सोहळा व ग्रंथदिंडीचे आयोजन करण्यात आले. "ज्ञानोबा माऊली तुकाराम" या जयघोषात संपूर्ण परिसर हरिनामात दंग झाला होता.

या सोहळ्यात इयत्ता5 वी ते 7 वी चे विद्यार्थी विठ्ठल-रुक्मिणी व संतांची वेषभूषा करून सहभागी झाले होते. काही विद्यार्थ्यांनी संत ज्ञानेश्वर, संत एकनाथ, संत नामदेव व संत तुकाराम यांचे रूप धारण करून वारकरी परंपरेचे सजीव चित्र उभे केले. सर्वजण टाळ-मृदंगाच्या गजरात “विठ्ठल! विठ्ठल!” म्हणत भक्तिरसात न्हालेल्या वातावरणात सहभागी झाले.

पालखी सोहळ्याची मिरवणूक काढण्यात आली. पालखीबरोबरच ग्रंथदिंडीचेही आयोजन करण्यात आले होते, ज्यामध्ये संतांच्या ग्रंथांचे पूजन करून त्यांची मिरवणूक काढण्यात आली.

प्रशालेच्या शिक्षिका सौ मुक्ता कौलगुड मॅडम यांनी वारीची माहिती सांगितली . स्वप्नाली देशपांडे मॅडम व तिजारे सर यांच्या सोबत विद्यार्थ्यांनी अभंग गायिले .
पारंपरिक ‘फुगड्या’ घालून, भजन गाऊन वातावरण भक्तिमय केले. या सोहळ्याच्या माध्यमातून विद्यार्थ्यांना वारकरी संप्रदायाचे महत्त्व व संस्कृतीची ओळख पटली.
संपूर्ण कार्यक्रम अत्यंत आनंदात व उत्साहात पार पडला.